بكّير؟

 رؤى: بتعرف إنو في فيلسوف يوناني من القرن التالت قبل الميلاد، اسمو أرسطرخرس الساموسي، اكتشف إنو الأرض بتدور حوالين الشمس وحوالين محورها؟

مرهف: عنجد؟

رؤى: إي، كل الناس وقتها كانوا مفكرين الأرض ثابتة وكل شي عميدور حواليها، بس هو قدم نموذج وضح فيه إنو مسارات الكواكب بتصير أسهل للفهم والحساب إذا افترضنا إنها عمتدور حوالين الشمس.

مرهف: طيب؟ وشو صار؟

رؤى: ما حدا عبّرو

مرهف: لعمش... ليش الناس هبل هيك؟ يعني لو أخدوا فكرتو على محمل الجد كنا وين صرنا هلأ؟ لو عرفنا هالفكرة من قبل الميلاد بدل ما نستنى للقرن السادس عشر كنا هلأ عمنكتشف المجرات...

رؤى: القصة مو بهالبساطة...

مرهف: ليش؟

رؤى: لأنو كلامو ما كان منطقي وقتها! كان مخالف لكل شي تاني منعرفو! يعني تخيل أنا وأنت عايشين وقتها وأنت قلتلي الأرض عمتتحرك بسرعة آلاف الكيلومترات بالساعة، رح أسألك بكل بساطة إنو إذا هالهبد صحيح فليش ما منحسها عمتتحرك؟

مرهف: إي بس نسبية الحركة بتقول...

رؤى: نسبية الحركة ما رح نكتشفها لوقت ما يجي غاليليلو... بعدين حأسألك إنو يا أهبل لو كانت الشمس هي اللي بالمركز، ليش لما كب حجرة بتنزل عالأرض؟ مو المفروض تنزل عالشمس؟

مرهف: ...

رؤى: قوانين الجاذبية ما رح نكتشفها ليجي نيوتن...

مرهف: طيب فهمت، بس إنتي هيك عمتقولي إنو فكرة مركزية الشمس كانت بالأول غلط، وبعدين صارت صح بس اكتشفنا هالنظريات التانية؟

رؤى: لاء، هي دائماً كانت صح، بس ما كانت منطقية. الناس ما كانوا "هبل". النظرية انطرحت أكتر من مرة وعبر أكتر من عالم وفيلسوف، بس كان دائماً عميتقدم عليها اعتراضات كتير قوية ومنطقية. كان لازم نستنى اكتشافات تانية لنقدر ناخد هيك نظرية بشكل جدي. أسلافنا ما غلطوا بهالنقطة، بالعكس كانوا منطقيين كتير

مرهف: يمكن معك حق، أسلافنا كانوا منطقيين بتفكيرهم، بس بنفس الوقت كانوا على غلط...

رؤى: مزبوط، التفكير المنطقي مالو مرادف للصحة. أنت ممكن تحلل مسألة ما بشكل ممتاز، ومع هالشي يكون جوابك غلط، لأنو في معلومات معينة ما تكشفتلك لسا.

مرهف: طيب بس هالشي بيخلي الطاسة ضايعة، يعني ممكن أي حدا يجي ويشلف أفكار يمين وشمال، وإذا حاججناه بيقول "إي أنت في أمور ما انكشفتلك"

رؤى: لا أتفق، مزبوط التفكير المنطقي مالو مرادف للصحة، بس هو الطريق الأمثل والأكثر اعتماداً. صحيح ممكن يللي عميفكر منطقياً يغلط، بس بما إنو ما في عندنا قدرة عالتنبؤ بالمستقبل، فالاعتماد على هالأداة المعرفية هو الحل الوحيد. وبدنا نتأمل إنو إذا منلتزم بالتفكير المنطقي، الأمور رح تتكشفلنا شوي شوي

مرهف: طيب بس إذا أنا فهمان عليكي صح، فإذا واحد بيجي بيقوللي "شو أنت أفهم من أرسطو ولا من نيوتن"، فيي قلو إي!

رؤى: أكيد! أنت، مع احترامي، مالك أذكى منهم ولا منطقي أكتر منهم

مرهف: تسلمي

رؤى: بس أنت بتعرف معلومات وأمور ما تكشفتلهم ولا لأحفادهم. أرسطو كان يفكر إنو في أشعة بتطلع من عيوننا بتخلينا نشوف شو في حوالينا، ونيوتن كان يمارس الخيمياء. هي كلها كانت أمور منطقية بزمنهم، المشكلة هي لما نجي وناخد أقوالهم وآراءهم ونعتبرها حقيقة. الشي اللي لازم ناخدو من هالشخصيات التاريخية هي أساليبهم وطرائقهم وبراعتهم. أما الآراء نفسها، فعفا عليها الزمن وراح

مرهف: وقد إيه من عمري قبلك راح!