تصميم متسامح مع الأخطاء
- بفهم منك إنو الفيسبوك هو برنامج شغلوه على كمبيوتر، وحطوا هالكمبيوتر بشي مطرح بأمريكا، مزبوط؟
- مزبوط
- ولما أنا أفتح تلفوني عتطبيق الفيسبوك، هاد التطبيق بيصير بيتواصل مع هالكمبيوتر اللي بأمريكا مشان يجيب منو المنشورات والتعليقات وهالقصص، مزبوط؟
- مزبوط
- وهالكمبيوتر بيضل شغال 24 ساعة؟
- إي نعم
- طيب ما بيعلق؟ ما بيطفي؟ ما بتقطع عنو الكهربا؟ يا زلمة أنا كمبيوتري كل كم ساعة لازم إعملو إعادة تشغيل.
- مبلى، بيعلق وبينطفي وبتنقطع عنو الكهربا، متلو متل كمبيوترك
- عنجد؟ طب لكن كيف بيضل الفيسبوك شغال وعميجيب منشورات وتعليقات طول الوقت؟ شو بيعمل لما هالكمبيوتر بيطفي؟
- بيروح على كمبيوتر تاني
- لحظة، شو؟ يعني الفيسبوك مو ماشي على كمبيوتر واحد، ماشي على كمبيوترين؟
- الفيسبوك يا صديقي ماشي على آلاف الكمبيوترات. وهالكمبيوترات طول الوقت عمتعلق وعمتطفي وعمتنقطع عنها الكهربا. بس كل هالشي مخفي عنك؟
- كيف مخفي عني؟
- لما تلفونك يجرب يحكي مع كمبيوتر الفيسبوك، في كمبيوتر تالت بينك وبينو، بيشوف مين من الكمبيوترات شغال ومين مضروب، وبينقيلك واحد تحكي معو
- يووووه، معناتا حتى لو تلت رباع كمبيوترات الفيسبوك مضروبة، بيضل فيي أفتح فيسبوك.
- تماماً
- بس لحظة، هالكمبيوتر اللي قاعد بالنص، هاد ما بيعلق وبيطفي وبتنقطع عنو الكهربا؟
- هههه، حزير شو جوابي
- ما تقلي؟ هو كمان في كمبيوترات تانية قبلو مشان ما تخليني حس لما يطفي؟
- إي نعم، في كمبيوترات ورا كمبيوترات ورا كمبيوترات، كلها شغلتها تخفي عنك كل هالفوضى، ليوصلك الفيسبوك على رواق. هاد التصميم منسميه "تصميم متسامح مع الأخطاء fault-tolerant design" هو اللي بيحوللك عالم الفوضى لعالم الأمان والاطمئنان
- بس لسا في فوضى تانية كمان ما ذكرتها
- شو هية؟
- الفيسبوك عميوصل عالتلفون بإيدي، بس هالتلفون كلو فوضى، كلو ذرات وإلكترونات عمتخبط ببعضها وتتطاير يمين وشمال. فوضى مطلقة، بس أنا بضل شايف الفيسبوك هادي ورايق
- شكلو الطبيعة كمان فيها "تصميم متسامح مع الأخطاء"
- قولتك
Comments
Post a Comment